නුඹ ම වේ නම් පමණි.....

නුඹ,
අසංඛ්‍ය වර්ෂ ගණනක් තිස්සේ
ප්‍රේමය ප්‍රේමය ම නොවන්නේ
මන්දැයි පසක් කරන්නීය.
පරස්පරතා අසමානතා අතර
එකඟතා සමානතා සම්මුතීන්
අනන්ත වර නොනැවතී
එළඹෙන බව ද
එසේ වන්නේ
අප'තර ප්‍රේමය නිසා ම
වන බව ද කියාදුන්නීය.
මිහිමත පතිත
එකදු ලේ බිඳක් වුව
බොල් නොවේ යැයි
සරුවට වැඩී ඒ යැයි
සපත කරන්නීය.
සඳ පෙනෙන අතු පැල තුළ ද
ඇස්බැස්ටෝසීය මහා මාලිග තුළ ද
රුක් මුදුනත සඳලුතල තුළ ද
ප්‍රේමය සොයාගත්තීය.
සිළිටි ගිනි පුපුර වුව
හිරු පවා දවා හළු කරන්නේ
මතු දිනෙක
නවමු එළියකින්
දිලෙන්නට බැව් දන්නීය.
රනින් කළ හෝඩි පොත්
සම සම ව කැබලි කොට
ගම් දොරක සිප් හළෙක
ලොව නොදුටු දරු කැළට
අකුරු එකිනෙක ගළපා
ප්‍රේමය නම්
මෙය ම යැයි
ප්‍රේමයෙන් උගන්වන්නීය.

ආදරිය....
අසංඛ්‍ය වර්ෂ ගණනක් තිස්සේ
ප්‍රේමය ම නොවන ප්‍රේමයෙන්
නිසරු බිම් සරු කර
අස්වද්දන්නට
වෙඩි උණ්ඩ පවා
සවිය දුන් සැටි මතකය.
මේ මල් මිට පවා
බයිනෙත්තු කෙළවරට වීසිකොට
ලොවක් සුවඳ කළ හැකි බව ද
මියෙන්නන් ඉපදී
නැවත නැවතත් එයම
සිදුකරන බව ද දනිමි.

ඉතින්........
නුඹ ප්‍රේමය ම වන්නේ
සිත්තර කතා පොතක
සුවඳැති පිටු අතර මතු නොව
ගිනි කාෂ්ටක පොළොවක
උපදින 'විප්ලවය',
ප්‍රේමිය....
නුඹ ම වේ නම් පමණි.....

ආදරෙයි නුඹට.......

MDN

2018 අග‌ෝස්තු 8 දින ලියන ලද්දකි

අල්යෝනා නොහොත් අයිස් බර්ගීය කාර්තුව

හිම තුහිනයක් කියන්නෙම හීනයක්
යළිත් ඇහැරෙනු බැරිව වැළපෙන!
එහෙනම්,
උණුම උණු දහවලක වුව
අයිස් බර්ගයක් ව,
අල්යෝනා උඹ

ඔහොම ඉන්නේ කොහොමද
පීටර්ස්බර්ග් වීදිවල?
එළියට නොපෙන්නුවත්
මොනතරම් දේවල් තියෙනවද,
රතු පාට හිම යට හැංගුන?

වොල්ගාව අසබඩ
දිරාපත් වූ දෑකැතිය.
ගමේ ළඟකදි
ගොයම් කැපුවේ නැතිවද?
ඇස්බැස්ටෝස් පැක්ටරියෙ දෙන
සිලෝන් ටී අද
තවම රතුමද?
ලෙනින් නිදි ඇත!
රතු චතුරස්‍රෙ නිහඬව
"දාස් කැපිටාල්",
පොත් සල්පිලේ ලාබෙට?

අල්යෝනා නැගිටපං
නිදි ගැට කඩා හනිකට,
කිරි උතුරවා පිළිගනු

ඔක්තෝබරය ළඟ එන!
එතකොට,
කිරි බත් කකා කියතැකි අපට
"මොන තරම් දේවල් තියේද
සොහොයුර, නොස්ටැල්ජියාවෙ ගිල්ලන?"

ඉතිං අල්යෝනා,
මේ අයිස්බර්ගීය කාර්තුවයි.
උඹට හැක උන් හට කියන්නට,

ද්‍රෝහිකම් ඇති උගුල් විසිකර
සහෝදර කම්මලක් වෙත යමු
දිරාපත් වූ මිතුරු දෑකැති
නැවත සකසා ඵල නෙලාගමු
එකම ගමනක් අපට යන්නට
උදලු ගෙන මාවතක් සකසමු
වමට දකුණට වහල්කම් ඇත
අයිස් බර්ගය ලෙසින් සඟවමු

අල්යෝනා,
අවදි කරපං නිදා උන් හැම
වහල් නැති නව ලොව තනන්නට!
MDN
2018 සැප්තැම්බර් 23 දින ලියන ලද්දකි

සමනලු ලැහැස්තියි ඒ වෙඩි බුදින්නට

පැසයෙන් මිදී සමනලු ලොව බලන විට
වෙඩි ලුණු වැටී තිබුණා මල් පෙති මතට
ලොවටම සුවඳ දෙන්නට මතු පිපි මලට
සමනලු ලැහැස්තියි ඒ වෙඩි බුදින්නට

MDN

අරගලයයි, සිපගන්නට හොඳම තැන

ගෑස් කඳුළ, නෙත'ගින් දුක් ඉවතලන
ජල ප්‍රහාර, මල් වැසි ලෙස ඇදහැලෙන
සොඳුර, කුමට අපහට මල් උයන් වෙන
අරගලයයි, සිපගන්නට හොඳම තැන

MDN

2017 මාර්තු 6 දින ලියන ලද්දකි.

දයාබර අකිල මාමා වෙත,

ගිය සඳුදවත් අපිට ඉස්කෝලෙ පටන් ගත්තෙ නැති හින්දා ගෙදරට වෙලා ඉන්න ටිකේ, අපේ අයියා මාමට බැන බැන මේ දවස්වල ඉස්කෝලෙ යන හින්ද මට මේක ලියල එවන්න හිතුනෙ. අයියට ලොකුම තරහ තියෙන්නෙ අපිට ඉස්කෝලෙ පටන් ගන්නෙ නැතුව එයාලට පටන් ගත්ත හින්දා. එයා කියන කතාව තමයි අර හරීන් මාමගෙ අප්පච්චි කියන්න ඇතිලු අයි එස් එකෙන් බෝම්බ ගැහුවොත් ගහන්නෙ හය වසරෙන් පහළ උන්ට විතරයි කියල. ඒකලු අපිට පටන් ගන්න නැතුව ඇත්තෙ. මොනව උනත් මම දන්නවා මාමල අපි ගැන හිතල තමයි එහෙම කළේ කියල. ඇයි ඉතිං මොනවහරි උනොත් ලක්ෂ දෙකක් ද කොහෙද දෙනව කියල මාමා කිව්වනෙ. මං හිතන්නෙ අපේ අප්පච්චි නං ඒකට කැමති වෙයි. මොකද එයා නිතරම අයියට බැන බැන හිටියෙ තෝව හදාගත්තට වඩා හොඳයි කෙහෙල් ගහක් හරි හිටෙව්වනං කියලා.

හුඟක් දවසට ඉස්කෝලෙන් කට්ටි පැනලා මාට්ටුවෙලා ප්‍රින්සිපල් සර්ගෙනුත් වේවැල් පාර කාලා ගෙදර ඇවිත් අප්පච්චිගෙනුත් වේවැල් පාර කන අපේ අයියා කවදාවත් නැතුව ගිය සඳුදා උදෙන්ම ඉස්කෝලෙ ගියා. ළමයිනුත් අඩු හින්ද ටීචර්ලත් අඩුවෙයි කියල හිතාගෙන. මිනිහගෙ කරුමෙට ළමයින්ට වඩා ටීචර්ල ඇවිල්ල එදා. ඉතිං අයියල කොහේ කට්ටි පනින්නද අකිල මාමෙ ?

මම නං කියන්නෙ පුළුවන් නං අගොස්තු මාසෙ ඉවර වෙනකං හරි මේ නිවාඩුව දුන්නත් කමක් නෑ. මොකද අප්පච්චි කියනව මම අහගෙනයි, ජනාධිපති මාමා ශිෂ්‍යත්ව විභාගෙ නවත්තනව කිව්වය කියලා. ඒ විතරක් නෙමෙයි ඒ තීරණේ අරං තියෙන්නෙත් අපේ පංතිවලම ඉන්න ළමයින්ගෙන් අහලලු. අනේ ඉතිං කොච්චර දෙයක්ද ඒක. අම්මගෙයි ටීචර්ලගෙයි කන් කරච්චලෙන් බේරිලා ඉන්න පුළුවන් එතකොට. අම්ම නං කියන්නෙ ශිෂ්‍යත්වෙ හොඳට පාස් උනොත් උඹට ටවුමෙ ලොකු ඉස්කෝලෙකට යන්න පුළුවන් කියලා. ඒත් ඉතිං අපේ ඉස්කෝලෙ ඉස්සරහ " ළඟම පාසල හොඳම පාසල " කියල බෝඩ් එකක් ගහල මාමගෙයි ජනාධිපති මාමාගෙයි විජේකලා නැන්දගෙයි පොටෝ වගේකුත් ගහල තියෙන එකේ වැස්ස දවසට කුඩ ඉහළගෙන පන්තියෙ හිටියත් මං මොකටද වෙන ඉස්කෝලෙකට යන්නෙ. ඒ මොනව උනත් අපේ ඉස්කෝලෙ හොඳම ඉස්කෝලෙ කියල මාමාලම කියන්නෙ බොරුවට නෙමෙයි කියල මං අම්මට කිව්ව දවසක්. එතකොට අම්ම නං කිව්වෙ එහෙ(නං බලං හිටපං උඹලට දෙනව කිව්ව ටැබ් එකද කැබ් එකද මොකද්ද එකත් හෙට අනිද්ද එවයි කියලා. එතකොට තමයි මටත් මතක් උනේ දවසක් ප්‍රින්සිපල් සරුත් කිව්ව කියල එහෙම කතාවක් මාස ගාණකට කලිං. කොහොමින් කොහොමහරි අපේ අයියල මොනව කියල බැන්නත් මං දන්නව මාමා අපිට ආදරේ විත්තිය.

ලියන්න නං දේවල් ගොඩක් තිබුණත් මේ තියෙන ප්‍රශ්නත් එක්ක මාමලට ගජරාමෙට වැඩ ඇති. ඒක හින්ද ලොකු ලියුමක් කියවන්න වෙලාවක් නෑ කියල මම දන්නව. අනිත් දවසෙ මොකක් හරි කලබලයක් වෙනවනං කලින් කියන්න කියල හරීන් මාමගෙ අප්පච්චිට කියන්න හොර ගෙඩිය වගේ ඉන්නැතුව. ඒ වගේ ම ජනාධිපති මාමාවයි අර බෝඩ් එකේ පොටෝ එකක ඉන්න විජේකලා නැන්දවයි මතක් කළා කියන්න. එහෙනං මම මෙතනින් නවතින්නං.

මාමට බුදු සරණයි!

මීට,

හේනෙගෙදර ඉස්කෝලෙ

පහේ පංතියේ

සිරිමල්

2019 මැයි 9 දින ලියන ලද්දකි
(පාස්කු ප්‍රහාරය නිසා මතු වූ අර්බුදකාරී කාල වකවානුවට අදාළය)