අල්යෝනා නොහොත් අයිස් බර්ගීය කාර්තුව

හිම තුහිනයක් කියන්නෙම හීනයක්
යළිත් ඇහැරෙනු බැරිව වැළපෙන!
එහෙනම්,
උණුම උණු දහවලක වුව
අයිස් බර්ගයක් ව,
අල්යෝනා උඹ

ඔහොම ඉන්නේ කොහොමද
පීටර්ස්බර්ග් වීදිවල?
එළියට නොපෙන්නුවත්
මොනතරම් දේවල් තියෙනවද,
රතු පාට හිම යට හැංගුන?

වොල්ගාව අසබඩ
දිරාපත් වූ දෑකැතිය.
ගමේ ළඟකදි
ගොයම් කැපුවේ නැතිවද?
ඇස්බැස්ටෝස් පැක්ටරියෙ දෙන
සිලෝන් ටී අද
තවම රතුමද?
ලෙනින් නිදි ඇත!
රතු චතුරස්‍රෙ නිහඬව
"දාස් කැපිටාල්",
පොත් සල්පිලේ ලාබෙට?

අල්යෝනා නැගිටපං
නිදි ගැට කඩා හනිකට,
කිරි උතුරවා පිළිගනු

ඔක්තෝබරය ළඟ එන!
එතකොට,
කිරි බත් කකා කියතැකි අපට
"මොන තරම් දේවල් තියේද
සොහොයුර, නොස්ටැල්ජියාවෙ ගිල්ලන?"

ඉතිං අල්යෝනා,
මේ අයිස්බර්ගීය කාර්තුවයි.
උඹට හැක උන් හට කියන්නට,

ද්‍රෝහිකම් ඇති උගුල් විසිකර
සහෝදර කම්මලක් වෙත යමු
දිරාපත් වූ මිතුරු දෑකැති
නැවත සකසා ඵල නෙලාගමු
එකම ගමනක් අපට යන්නට
උදලු ගෙන මාවතක් සකසමු
වමට දකුණට වහල්කම් ඇත
අයිස් බර්ගය ලෙසින් සඟවමු

අල්යෝනා,
අවදි කරපං නිදා උන් හැම
වහල් නැති නව ලොව තනන්නට!
MDN
2018 සැප්තැම්බර් 23 දින ලියන ලද්දකි